Beckham hrósar Walcott

David Beckham hrósaði hinum unga Theo Walcott í hástert eftir að hann skoraði þrennu fyrir Englendinga gegn Króötum í undankeppni HM í gær.

Beckham missti sæti sitt í byrjunarliðinu í hendur hins 19 ára gamla Walcott, en hafði ekkert nema hrósyrði handa Arsenal-manninum unga eftir leikinn.

"Ef hann spilar svona í hverri vikur á hann eftir að fífla hvaða varnarmann sem er í heiminum. Allir sáu hvað hann var fljótur, hraði hans er ótrúlegur. Ef hann heldur svona áfram verður hann ótrúlegur leikmaður," sagði Beckham og hrósaði um leið hugarfari leikmannsins.

"Hann er kannski ungur, en hann hefur þegar öðlast góða reynslu og heldur sér á jörðinni. Ég þarf ekki að segja neitt við hann til að halda honum á jörðinni. Hann er hjá rétta félaginu og með góðan stjóra. Allir vita að Arsene Wenger heldur vel utan um leikmenn sína. Það eina sem ég sagði við hann var að njóta velgengni sinnar," sagði fyrrum fyrirliði enska landsliðsins.