Norska neyðarlínan ekki óbrigðul

Neyðarnúmerið einn einn tveir er ekki eins óbrigðult og menn halda. Þetta segir norska dagblaðið Bergensavisen og segir frá því þegar 18 ára stúlka hringdi ítrekað í neyðarlínuna aðfaranótt sunnudags, stödd í miðbæ Björgvinjar.

Hún hafði orðið fyrir árás ræningja en hjá neyðarlínunni svaraði enginn. Lögreglan í Björgvin segist ekki vilja tjá sig um einstök mál en viðurkennir að það geti komið fyrir að fólk nái ekki í neyðarlínuna. Einkum gildi þetta um háannatíma á borð við aðfaranótt sunnudags. Ekki batnaði ástandið þegar stúlkan komst loks á lögreglustöð til að tilkynna um árásina því þá munaði minnstu að hún yrði handtekin.