Jafntefli hjá Íslendingaliðunum

Bæði Coventry og Burnley gerðu í dag jafntefli í leikjum sínum í ensku B-deildinni í knattspyrnu í dag.

Aron Einar Gunnarsson lék allan leikinn í liði Coventry sem gerði 1-1 jafntefli við Derby á heimavelli í dag.

Rob Hulse kom Derby yfir á 41. mínútu en Clinton Morrison jafnaði metin á lokamínútu leiksins.

Jóhannes Karl Guðjónsson lék sömuleiðis allan leikinn fyrir Burnley sem náði 1-1 jafntefli gegn Charlton á útivelli.

Jóhannes Karl átti þátt í marki Burnley sem kom á þrettándu mínútu leiksins. Hann átti skot að marki sem Steve Thompson stýrði í markið og skrifast því markið á hann.

Svetoslav Todorov jafnaði metin fyrir Charlton á 76. mínútu og þar við sat.

Burnley er í áttunda sæti deildarinnar með 20 stig en Coventry í því sautjánda með sextán. Ekki munar nema ellefu stigum á liðunum í þriðja og 22. sæti.

Síðar í dag mætast Reading og QPR í lokaleik umferðarinnar.