Liverpool vann United

Fyrsta risaleik tímabilsins í ensku úrvalsdeildinni er lokið. Liverpool vann 2-1 sigur á Manchester United á Anfield í fyrsta leik Dimitar Berbatov með United.

United fékk þó óskabyrjun og Berbatov var ekki nema tvær mínútur að leggja upp sitt fyrsta mark fyrir félagið. Hann gaf hnitmiðaða sendingu inn í miðjan vítateig frá endalínunni þar sem Carlos Tevez var einn og óvaldaður og skilaði knettinum örugglega í netið.

Edwin van der Sar gerði sig svo sekan um klaufaleg mistök á 26. mínútu. Xabi Alonso reyndi fyrirgjöf sem fór af Patrice Evra og þaðan inn í teiginn. Van der Sar var of seinn í úthlaupið og gerði ekki betur en svo að slá boltann í Wes Brown sem gat ekki annað en að fylgjast með boltanum rúlla í netið.

Javier Mascherano var svo maðurinn á bak við sigurmark leiksins. Tveir leikmenn United reyndu að ná boltanum af honum en Dirk Kuyt varð fyrri til, renndi boltanum út í teiginn þar sem varamaðurinn Ryan Babel skoraði af öryggi.

Liverpool fékk svo annað gott færi undir lokin þegar að Dirk Kuyt var kominn einn gegn Van der Sar en lét verja frá sér.

Nemanja Vidic, leikmaður United, fékk að líta rauða spjaldið undir lokin fyrir tvö brot með skömmu millibili. Hann missir því af leik United gegn Chelsea.

Þetta var fyrsti deildarsigur Rafael Benitez á Manchester United sem knattspyrnustjóri Liverpool.

United byrjaði miklu mun betur í leiknum en það dró mikið af leikmönnum liðsins eftir því sem á leið leikinn, sérstaklega eftir að Babel skoraði. Þá tók Liverpool öll völd í leiknum.