United kláraði West Ham

Manchester United endurheimti þriggja stiga forystu sína á toppi ensku úrvalsdeildarinnar þökk sé 4-1 sigri á West Ham í dag.

Ronaldo skoraði fyrstu tvö mörk United í dag en þeir Carlos Tevez og Owen Hargreaves skoruðu hin tvö. Dean Ashton skoraði mark West Ham.

United lék manni færri í næstum klukkustund en Nani fékk að líta rauða spjaldið í leiknum og kemur því ekki við sögu í síðasta leik liðsins á tímabilinu, gegn Wigan um næstu helgi.

Nú þurfa United-menn að bíða eftir leik Chelsea og Newcastle á mánudaginn kemur en sigri Newcastle þann leik er United svo gott sem orðið meistari.

Sir Alex Ferguson stillti upp óbreyttu liði frá því sem vann Barcelona í vikunni þar sem þeir Wayne Ronney og Nemanja Vidic voru frá vegna meiðsla.

Luis Boa Morte kom inn í byrjunarlið West Ham í stað Freddie Ljungberg sem rifbeinsbrotnaði gegn Newcastle. Þá er Julien Faubert einnig meiddur og Hayden Mullins kom inn í hans stað.

Margir stuðningsmenn United óttuðust að leikurinn í dag yrði erfiður enda West Ham oft reynst United erfitt.

En Ronaldo var ekki lengi að láta til sín taka. Strax á þriðju mínútu leiksins fékk hann boltann og sótti að marki West Ham. Lucas Neill rann og missti af honum og Ronaldo brunaði inn í teiginn og skoraði með föstu skoti en boltinn breytti örlítið um stefnu á George McCartney.

Þetta var 39. mark Ronaldo á tímabilinu í öllum keppnum og það fertugasta kom um 20 mínútum síðar.

Í millitíðinn komst reyndar West Ham nálægt því að jafna metin en Patrice Evra varði á línu eftir skalla Bobby Zamora að marki United.

Á 24. mínútu átti Owen Hargreaves fyrirgjöf frá hægri og sveif boltinn yfir varnarmenn West Ham og í læri Ronaldo sem náði þó að stýra knettinum í netið af stuttu færi.

Aðeins tveimur mínútum síðar kom þriðja mark United og það var stórglæsilegt. Carlos Tevez lét vaða af 30 metra færi og Robert Green náði ekki að verja skotið.

Dean Ashton náði svo að minnka muninn stuttu síðar með öðru glæsimarki. Hann skoraði með bakfallsspyrnu eftir að Wes Brown mistókst að hreinsa fyrirgjöf frá hægri.

Áður en fyrri hálfleikur var úti fékk svo Nani rautt spjald fyrir að danglast í Neill og virtist sem svo að United væri að missa tökin á leiknum.

En þeir stjórnuðu engu að síður áfram ferðinni í síðari hálfeik - spiluðu skynsamlega og gáfu fá færi á sér. Michael Carrick innsiglaði sigurinn í síðari hálfleik er skot hans af 30 metra færi breytti um stefnu á Neill og gat Green engum vörnum komið við.

Eftir það var ljóst að West Ham myndi aldrei ná að jafna leikinn og mikilvægur sigur United staðreynd.