Alan Smith fótbrotinn

Enska úrvalsdeildarfélagið Newcastle hefur orðið fyrir enn einu áfallinu eftir að í ljós kom að Alan Smith er með brákað bein í fæti. Óttast er að hann gæti misst úr næstu þrjá mánuði með liðinu.

Hinn 27 ára gamli Smith er að gera sig kláran fyrir aðgerð og útilokað þykir að hann muni koma við sögu hjá liðinu á þessu ári í kjölfarið.

Smith hefur reyndar ekki komið mikið við sögu hjá Newcastle á leiktíðinni og var orðaður við önnur félög í sumar, en meiðsli í herbúðum liðsins hafa eflaust verið farin að glæða vonir hans um að vinna sér sæti í liðinu.

Newcastle sækir West Ham heim í úrvalsdeildinni á sunnudaginn, en það verður fyrsti leikur Gianfranco Zola sem knattspyrnustjóri West Ham.