Draugaleikurinn ekki endurtekinn

Enska knattspyrnusambandið segir ljóst að leikur Watford og Reading verður ekki endurtekinn. Leikurinn endaði með 2-2 jafntefli en fyrsta mark Reading í leiknum var í meira lagi undarlegt.

Dómarar leiksins dæmdu mark þó boltinn hafi aldrei verið nálægt því að fara yfir marklínuna. Steve Coppell, stjóri Reading, sagði að hann væri reiðubúinn að endurtaka leikinn.

Watford ákvað þó að fara ekki fram á að leikurinn yrði endurtekinn. Enska knattspyrnusambandið segir að ákvörðun dómara í leikjum sé endanleg og því eigi þetta „mark" að standa.

Nigel Bannister aðstoðardómari flaggaði mark og Stuart Attwell dómari fór eftir hans bendingum.