Arsenal hefur gengið illa á Reebok

Arsenal á fyrir höndum erfiðan leik gegn Bolton í ensku úrvalsdeildinni á morgun ef marka má viðureignir liðanna síðustu ár.

Bolton hefur unnið þrjá af síðustu fjórum heimaleikjum sínum gegn Arsenal í úrvalsdeildinni og státar ásamt Liverpool af næstbesta heimaárangri allra liða í deildinni gegn Lundúnaliðinu síðan árið 2003.

Aðeins Manchester United er með betri heimaárangur gegn Arsenal á síðustu fimm árum.

United hefur þannig unnið 4 af 6 leikjum sínum gegn Arsenal heima, einum leiknum lauk með jafntefli og einn tapaðist.

Bolton hefur unnið 3, gert 2 jafntefli og tapað 1 heima gegn Arsenal og árangur Liverpool er reyndar nákvæmlega sá sami - og meira að segja markatala liðanna í þessum 6 leikjum er nákvæmlega sú sama: 11-7.