Ótrúlegt að maður skuli stunginn á Bobbys Kiosk - myndband

„Bobbys Kiosk er rólegur og góður staður og þar gerist aldrei neitt misjafnt," sagði Annette Arentsen, í samtali við Vísi.

Annette rekur pylsuvagn á Colbjörnsensgade 15 í Kaupmannahöfn, sama stað og Íslendingur var stunginn sjö sinnum með hnífi í nótt. Þar í grennd er hótel sem Íslendingar gista gjarnan á í Kaupmannahöfn.

Annette segir að Bobby sé indælismaður á miðjum aldri og ljóst að hann hafi ekki komið þarna við sögu þar sem þeir sem voru handteknir vegna málsins séu sautján og tuttugu og eins árs. Sér kæmi enda ekki til hugar að Bobby myndi beita nokkurn mann ofbeldi, hvað þá að nota vopn.

Annette var í fríi í sumarhúsinu sínu þegar Vísir náði í hana. Hún sagðist því ekki vita gjörla um atburðarrásina, aðeins það sem komið hefði fram í fjölmiðlum.

Henni fannst ótrúlegt að hníf hafi verið beitt á Bobbys Kiosk.