Zola ákveður sig á morgun

Gianfranco Zola tjáði sig í kvöld um möguleikann á því að taka við starfi knattspyrnustjóra hjá enska úrvalsdeildarfélaginu West Ham.

West Ham er í eigu Björgólfs Guðmundssonar og samkvæmt heimildum Vísis hefur stjórn félagsins falið Scott Duxbury, framkvæmdarstjóra, að halda til viðræðna við Zola með það fyrir augum að bjóða honum starfið.

Zola hefur verið starfandi sem annar aðalþjálfari U-21 landsliðs Ítalíu sem gerði í kvöld 1-1 jafntefli gegn Króatíu í lokaumferð undankeppni EM 2009.

„Ég vildi ekki ræða um West Ham af virðingu við ítalska knattspyrnusambandið," sagði hann eftir leikinn. „Ég stend þeim í þakkarskuld fyrir að gefa mér þetta frábæra tækifæri. Ég mun taka ákvörðun á morgun og þá mun ég tala."

Hann sagði að honum hefði komið á óvart hversu vel ítalska landsliðinu hefur gengið. „Í sannleika sagt átti ég ekki von á því að fara í þjálfun en ég varð spenntur fyrir þessu og hér er ég í dag."