Afsökunarbeiðni frá Buffon

Gianluigi Buffon, markvörður Ítalíu, hefur beðið ítalska stuðningsmenn afsökunar eftir frammistöðu liðsins gegn Hollandi í kvöld. Holland vann 3-0 en Buffon bar fyrirliðaband ítalska liðsins í leiknum.

„Ég vona að þetta komi okkur á jörðina. Þetta er ein versta frammistaða sem ég man eftir á landsleikjaferlinum og Holland átti þennan sigur skilinn, liðið lék mjög vel," sagði Buffon.

„Ég talaði við alla leikmenn eftir leik og við vorum sammála um að biðjast afsökunar á spilamennsku okkar," sagði Buffon sem stóð fyrir sínu í leiknum þrátt fyrir að hafa fengið þrjú mörk á sig.

Roberto Donadoni, þjálfari Ítalíu, vildi ekki gera mikið úr tapinu í kvöld og þóttist hafa litlar áhyggjur. Hann sagði að úrslitin gæfu alls ekki rétta mynd af gangi leiksins.