Hollendingar fóru illa með heimsmeistarana

Holland vann Ítalíu 3-0 í dauðariðli Evrópumótsins í kvöld. Leikurinn var bráðfjörugur, hiklaust skemmtilegasti leikur mótsins til þessa.

Hollenska liðið sýndi frábæra spilamennsku og að það er til alls líklegt á mótinu.

Jafnræði var með liðunum í byrjun leiks en eftir því sem á hálfleikinn leið náðu Hollendingar meiri völdum. Þeir komust yfir á 26. mínútu þegar Ruud van Nistelrooy framlengdi skoti Wesley Sneijder í netið. Ítalir voru ekki sáttir með að Nistelrooy yrði ekki dæmdur rangstæður.

Christian Panucci gerði það hinsvegar að verkum að Nistelrooy var réttstæður. Panucci lá meiddur fyrir aftan endamörkin en hafði ekki fengið leyfi dómarans til að yfirgefa völlinn og því enn talinn þátttakandi í leiknum.

Sneijder bætti síðan öðru marki við fyrir Holland á 31. mínútu eftir frábæra sókn. Holland fékk hraða sókn og eftir skallasendingu frá Dirk Kuyt náði Sneijder að koma knettinum framhjá markverðinum Gianluigi Buffon.

Buffon kom í veg fyrir að Holland væri þremur mörkum yfir í hálfleik þegar hann varði frábærlega frá Nistelrooy sem var í upplögðu færi. Í seinni hálfleik juku Ítalir sóknarleik sinn og fengu nokkur úrvals marktækifæri. Hinsvegar gekk þeim ekki að koma boltanum framhjá Edwin van der Saar, markverði Hollands, sem átti stórleik.

Eftir eitt af þeim skiptum þar sem van der Saar varði vel komust Hollendingar í aðra hraða sókn og skoruðu þriðja markið. Aftur var það Kuyt sem lagði upp mark en nú fyrir Gio Van Bronkhorst sem skoraði með skalla á 79. mínútu og innsiglaði frábæran sigur Hollands.