Fengu stóran skell þegar þeir vígðu Valsvöll síðast

Valsmenn spila í kvöld fyrsta leikinn á nýja Vodafone-vellinum sínum að Hlíðarenda þegar þeir fá topplið Fjölnis í heimsókn en nýliðarnir úr Grafarvogi hafa unnið fyrstu þrjá leiki sína í efstu deild.

Valsmenn ætla örugglega að gera betur en þeir spiluðu sinn fyrsta heimaleik á Hlíðarenda fyrir tæpum 25 árum síðan. Valsmenn léku þá fyrstir Reykjavíkurfélaga heimaleik á sínu svæði þegar þeir tóku á móti Þrótturum 13. ágúst 1983 en fram að því höfðu leikið heimaleiki sína á Melavellinum eða í Laugardalnum.

Það vakti athygli að Valsmenn lengdu bæði og breikkuðu völlinn fyrir leikinn á móti Þrótti fyrir 25 árum síðan en hann var 110x70 metrar í þessum fyrsta leik. Það gekk þó ekki betur en Þróttarar unnu öruggan 4-1 sigur á Val og skoruðu meðal annars fjögur fyrstu mörkin á Valssvæðinu.

Ingi Björn Albertsson skoraði fyrsta mark Valsmanna á Valsvellinum þegar hann minnkaði muninn í 4-1 þremur mínútum fyrir leikslok. Áður hafði félagi hans í Valsliðinu Hörður Hilmarsson fengið að líta rauða spjaldið og Þróttarar höfðu auk þess klikkað á vítaspyrnu þannig að þessi fyrsti heimaleikur Valsliðsins á Hlíðarenda var ein stór vonbrigði.

Valsmenn náðu reyndar að bæta úr þessu tíu dögum síðar þegar liðið vann 2-0 sigur á Þór þar sem Ingi Björn og Hilmar Sighvatsson (víti) skoruðu mörkin. Ingi Björn skoraði fjögur af fyrstu fimm mörkum Valsmanna á Valsvelli því hann skoraði einnig tvö fyrstu mörkin í 3-0 sigri á ÍBV í síðasta heimaleik liðsins þetta sumar sem jafnfram bjargaði liðinu frá falli úr deildinni.

Valsmenn spila í kvöld sinn fyrsta heimaleik á Hlíðarenda síðan 17. september 2005 þegar þeir töpuðu 1-2 fyrir Þrótturum sem náðu þar með að vinna fyrsta og síðasta leikinn sem spilaðir voru á gamla vallarsvæði Valsmanna á Hlíðarenda.

Síðan þá hafa Valsmenn leikið 19 heimaleiki í röð á Laugardalsvelli. Þeir töpuðu aðeins tveimur þeirra en unnu jafnframt aðeins 9 því liðið gerði 8 jafntefli í þessum 19 leikjum sínum í Laugardalnum.

Fyrsti leikur Vals á Valsvelli 13. ágúst 1983:

14. umferð

Valur-Þróttur 1-4

0-1 Arnar Friðriksson (12.), 0-2 Ársæll Kristjánsson (43.), 0-3 Sverrir Pétursson (45.), 0-4 Páll Ólafsson (57.), 1-4 Ingi Björn Albertsson (87.).

Fyrirsagnir blaðanna:

Morgunblaðið: Sigur Þróttar gat hæglega orðið stærri

DV: Baráttuglaðir Þróttarar gjörunnu bitlaust lið Valsmanna

Þjóðviljinn: Víðáttan á Valsvellinum hentaði Þrótti öllu betur