Gífurleg reiði vegna árásar í Bagdad

Gífurleg reiði er í Írak eftir að hryðjuverkamenn beittu fyrir sig tveimur fötluðum konum til sjálfsvígssprenginga í Bagdad.

Jafnvel sé mið tekið af gegndarlausum hrottaskap gagnvart óbreyttum borgurum í Írak undanfarin þrjú ár, þá bar árásin í gær vitni um óvenjumikla fúlmennsku. Sprengjur voru sprengdar með 20 mínútna millibili á tveimur gæludýramörkuðum í Bagdad. Mikill mannfjöldi var á mörkuðum enda veðrið milt eftir kuldakast í janúar. Í báðum tilvikum höfðu hryðjuverkamennirnir komið sprengjum fyrir á konum með Downs heilkennið.

Árásarmennirnir virðast hafa notað fjarstýringu til að kveikja í sprengjunum. Yfirvöld í Írak og Bandaríkjunum segja að þessi notkun á fötluðu fólki til sjálfsvígssprenginga sýni fram á siðferðislegt gjaldþrot hryðjuverkamanna.

Talið er að Al Kaída samtökin í Írak eigi nú erfiðara um við að fá unga karlmenn til að fórna lífi sínu og því hafi þau gripið til þess ráðs að nota fólk sem ekki gerir sér grein fyrir því sem það er að gera. Níutíu og níu manns létu lífið í árásunum og rúmlega 140 særðust. Fólkið var borið til grafar í morgun.