Ashley: Þetta er brjálæði

Mike Ashley, eigandi Newcastle, tilkynnti í gær að hann ætlaði að selja félagið. Hann segist ekki treysta sér til að taka þátt í því brjálæði sem það er að eiga knattspyrnufélag.

Í tilkynningu frá Ashley í gær kom fram að hann virti óskir stuðningsmanna félagsins sem flestir heimta hann á brott og því ætlaði hann að selja ráðandi hlut sinn í Newcastle United - eftir að hafa átt félagið í um eitt ár.

Newcastle er nú að leita að níunda knattspyrnustjóranum á aðeins ellefu árum og Ashley segist ekki geta tekið þátt í því sem hann kallar brjálæði.

"Í hvert sinn sem skipt er um knattspyrnustjóra þarf að eða milljónum punda í nýja leikmenn og milljónum er tapað þegar leikmenn eru seldir. Ég get ekki haldið áfram að vinna við þessar aðstæður. Þetta er brjálæði. Newcastle hefur ekki tekjur stóru félaganna og ég er enginn milljarðamæringur með ótæmandi sjóði til að eyða í félagið. Ég hef bara ekki efni á því," var haft eftir Ashley í dag.

Hann lofar að reyna að koma félaginu í hendurnar á mönnum sem muni bera hag stuðningsmanna fyrir brjósti.

"Ef ég get ekki selt félagið til manna sem munu gefa stuðningsmönnunum það sem þeir vilja, mun ég halda áfram að reka félagið eftir raunhæfum leiðum. Ég hef haft gaman af því að fara á leiki með Newcastle, en nú er mér ráðlagt að gera það ekki af því ég gæti orðið fyrir árás," sagði Ashley.