Scolari: Sanngjörn úrslit

Luiz Felipe Scolari, stjóri Chelsea, sagði að jafntefli hefði verið sanngjörn niðurstaða í dag þegar hans menn gerðu 1-1 jafntefli við Manchester United á Stamford Bridge.

United byrjaði með látum og komst yfir í leiknum, en Chelsea var sterkara í síðari hálfleik og náði að jafna leikinn tíu mínútum fyrir leikslok.

"Mér fannst þetta sanngjörn úrslit. Mér fannst þetta einn af okkar bestu leikjum í ljósi þess að við lentum í smá vandræðum, en það sama má segja um United," sagði Scolari í samtali við Sky.

"Þeir stjórnuðu ferðinni í 5-15 mínútur og voru betri en við. Þeir náðu að skora en við bættum okkur eftir það. Við fengum lika færi sem við hefðum átt að nýta," sagði Scolari.