Þjóðverjar handteknir eftir nasistahróp

157 manns voru handteknir í Klagenfurt í Austurríki í gær þar sem leikur Þýskalands og Póllands fór fram. Flestir voru stuðningsmenn þýska landsliðsins.

Fulltrúi lögreglunnar sagði að margir hafi hrópað slagorð nasistaflokksins en mikill hiti var bæði í stuðningsmönnum Þýskalands og Póllands fyrir leikinn. Þýskaland vann leikinn, 2-0.

Klagenfurt er minnsta borgin þar sem leikið er í EM 2008 í Austurríki og Sviss. 91 þúsund manns búa í bænum en 80 þúsund ferðamenn eru í bænum vegna Evrópumótsins.

Þýskaland og Króatía mætast í borginni á fimmtudaginn kemur og er lögreglan við öllu búin fyrir þann leik.