Áfangaheimili opnar ekki nema húsnæði verði tryggt

Velferðarsvið Reykjavík hefur ekki lokið við gerð samnings við Heilsuverndarstöðina um rekstur áfangaheimilis í Hólavaði í Norðlingaholti þar sem ekki liggur endanlega fyrir hvort umrætt húsnæði sé til ráðstöfunar þar sem það er nú í eigu þrotabús. Þetta kemur fram í tilkynningu frá velferðarsviði.

Vísir greindi frá því fyrr í vikunni að eigandi raðhúsalengjunnar við Hólavað 1 til 11 var lýstur gjaldþrota 8. apríl síðastliðinn.

Íbúar í nágrenni við fyrirhugað áfangaheimili hafa undanfarið safnað undirskriftum gegn heimilinu sem ætlunin var að afhenta borgarstjóra í dag. ,,Borgarstjóri ætlaði að taka á móti okkur í dag en gat það ekki af einhverjum ástæðum. Aftur á móti ætlar að hann að taka á móti okkur á morgun," segir Hafsteinn Þór Eggertsson, íbúi í hverfinu og einn skipuleggjanda undirskriftasöfnunarinnar.

Starfsemi heimilisins verður kynnt fyrir íbúum í Norðlingaholti þegar tryggt verður að Heilsuverndarstöðin hafi íbúðirnar í Hólavaði til ráðstöfunar.

Tilkynning velferðarsviðs:

Velferðarráð Reykjavíkurborgar samþykkti á fundi sínum 9. apríl s.l. að ganga til samninga við Heilsuverndarstöðina ehf./ Alhjúkrun um rekstur á nýju búsetuúrræði með félagslegum stuðningi. Búsetuúrræðið er samvinnuverkefni Velferðarsviðs Reykjavíkurborgar og félags- og tryggingamálaráðuneytisins.

Um er að ræða búsetuúrræði fyrir allt að 20 einstaklinga sem hætt hafa neyslu áfengis eða vímuefna en þurfa á umtalsverðum stuðningi að halda til að ná tökum á lífi sínu. Markmiðið er að veita húsaskjól, félagslegan stuðning og endurhæfingu fyrir einstaklinga sem hætt hafa neyslu áfengis- og vímuefna en þarfnast sérstaks stuðnings til að geta búið sjálfstætt og tekið virkan þátt í samfélaginu án neyslu áfengis- og vímuefna. Heimilinu er ætlað að tryggja jafnrétti og skapa skilyrði til eðlilegs lífs þrátt fyrir að viðkomandi hafi átt við erfiðleika að stríða.

Gerð verður endurhæfingaráætlun við hvern einstakling varðandi þjálfun í athöfnum daglegs lífs og virka þátttöku í samfélaginu með stuðningi, hvatningu og leiðbeiningum starfsfólks.

Á heimilinu verður sólarhringsvakt og verður einstaklingum ekki heimilt að neyta áfengis eða fíkniefna á meðan þeir búa á heimilinu. Sérstakur samningur verður gerður við hvern einstakling sem kveður á um umgengnis- og húsreglur og viðbrögð við brotum á þeim.

Velferðarsvið hefur ekki lokið samningum við Heilsuverndarstöðina þar sem ekki liggur endanlega fyrir hvort umrætt húsnæði sé til ráðstöfunar þar sem það er nú í eigu þrotabús.

Starfsemi heimilisins verður kynnt fyrir íbúum þegar tryggt verður að Heilsuverndarstöðin hafi húsnæðið til ráðstöfunar.