Allt um leiki dagsins: Mikilvægur sigur Bolton

Bolton náði að lyfta sér úr fallsæti í ensku úrvalsdeildinni þökk sé gríðarlega mikilvægum 1-0 sigri á Middlesbrough í dag.

Gavin McCann skoraði sigurmark leiksins á 60. mínútu en Grétar Rafn Steinsson lék allan leikinn í liði Bolton. Heiðar Helguson var hins vegar ekki í hópnum.

Fulham virðist nú dauðadæmt til að falla en liðið tapaði 2-0 fyrir Liverpool á heimavelli í dag þó svo að margir sterkustu leikmanna Liverpool höfðu hvílt í leiknum.

Þá gerðu Wigan og Tottenham 1-1 jafntefli og West Ham vann nauman 2-1 sigur á Derby sem er löngu fallið eins og flestir vita.

Middlesbrough - Bolton 0-1

0-1 Gavin McCann (60.)



Kevin Davies á við meiðsli að stríða og tekur þar að auki út bann í leiknum og tók Grzegorz Rasiak stöðu hans í liði Bolton. Grétar Rafn Steinsson var í byrjunarliði Bolton en Heiðar Helguson var ekki í leikmannahópi liðsins.

Mark Schwarzer lék ekki í marki Boro í dag og tók Ross Turnball stöðu hans.

Boro komst tvívegis nærri því að skora á upphafsmínútunum en í bæði skiptin var Ali Al Habsi, markvörður Bolton, einkar vel á verði.

Bolton komst svo nálægt því að skora fyrsta mark leiksins í upphafi síðari hálfleiks er Rasiak átti skalla í slá eftir hornspyrnu. Stuttu síðar átti Matt Taylor skot í stöng.

En svo fór að boltinn fór loksins inn og voru gestirnir þar að verki. Gary Cahill átti skalla eftir hornspyrnu sem Ross Turnbull varði en Gavin McCann náði frákastinu og skilaði knettinum í netið.

Einar mikilvægur sigur Bolton staðreynd og er liðið nú komið upp úr fallsæti á kostnað Birmingham sem á þó leik til góða. Middlesbrough er ekki nema fjórum stigum á undan Bolton en er þó í fjórtánda sæti.

Fulham - Liverpool 0-2

0-1 Jermaine Pennant (17.)

0-2 Peter Crouch (70.)

Steven Gerrard og Ryan Babel voru ekki í leikmannahópi Liverpool í dag og þeir Fernando Torres og Jamie Carragher sátu á varamannabekk liðsins. John Arne Riise og Jermaine Pennant voru í byrjunarliðinu sem og þeir Andriy Voronin og Peter Crouch.

Hjá Fulham var liðið óbreytt frá því að það vann Reading um síðustu helgi.

Leikurinn fór heldur rólega af stað en þá tók Pennant til sinna mála. Hann fékk sendingu frá Lucas Leiva og náði að þruma knettinum í efra markhornið nær. Keller kom engum vörnum við.

Riise komst svo nálægt því að bæta við öðru marki en Paul Staltieri náði að bjarga nánast á marklínu.

Liverpool hafði mikla yfirburði í leiknum og Crouch innsiglaði sigurinn með marki í síðari hálfleik. Pennant átti sendinguna og Crouch kláraði færið með laglegu skoti.

Þetta reyndist niðurstaðan og staða Fulham orðin ansi slæm. Fátt virðist geta bjargað liðinu frá falli.

Wigan - Tottenham 1-1

0-1 Dimitar Berbatov (6.)

1-1 Emile Heskey (12.)

Tom Huddlestone og Jamie O'Hara tóku stöður Jonathan woodgate og Pascal Chimbonda í byrjunarliði Tottenham en þeir síðarnefndu eru meiddir.

Steve Bruce, stjóri Wigan, gerði eina breytingu á liðinu sem gerði 1-1 jafntefli vði Chelsea en Michael Brown kom inn á miðju liðsins í stað Josip Skoko.

Huddlestone var ekki lengi að þakka fyrir sig og lagði upp mark fyrir Tottenham strax í upphafi leiks. Aaron Lennon náði fyrirgjöfinni en boltinn fór af Paul Scharner og beint fyrir fætur Dimitar Berbatov sem þrumaði knettinum í netið af stuttu færi.

En heimamenn voru heldur ekki lengi að svara. Fyrirgjöf kom frá vinstri og hafði Emile Heskey nægan tíma til að taka við boltanum, snúa og skila knettinum í netið.

Í seinni hálfleik komst Marcus Bent nálægt því að skora fyrir Wigan. Hann fékk fína sendingu frá Wilson Palacios og skaut hörkuskoti í slána á marki Tottenham.

En allt kom fyrir ekki og urðu bæði lið að sætta sig við skiptan hlut. Bæði lið sigla nokkuð lygnan sjó um miðjan deild þó svo að Wigan sé nú ekki formlega sloppið við fall.

West Ham - Derby 2-1

1-0 Bobby Zamora (20.)

1-1 Tyrone Mears (65.)

2-1 Carlton Cole (77.)

Sjö breytingar voru gerðar á byrjunarliði West Ham en Freddie Sears var í byrjunarliðinu í fyrsta sinn á ferlinum og James Tomkins í fyrsta sinn á heimavelli. Lucas Neill, John Pantsil, Mark Noble, Julien Faubert og Freddie Ljungberg voru einnig í byrjunarliðinu.

Mile Sterjovski var í byrjunarliði Derby í stað Emanuel Villa og þá var Dean Leacock í vörninni á kostnað Darren Moore.

Bobby Zamora kom West Ham yfir snemma leiks með skalla af stuttu færi.

Zamora kom svo knettinum öðru sinni í netið skömmu síðar en markið var dæmt af.

Derby kom svo flestum að óvörum þegar liðið náði að jafna metin um miðjan síðari hálfleik. Hossam Ghaly átti sendingu inn fyrir vörn West Ham á Tyrone Mears sem afgreiddi knöttinn örugglega í netið.

Þó svo að West Ham hafi að litlu að keppa í deildinni væri það heldur slæmt fyrir liðið að vinna ekki eitt slakasta lið í sögu ensku úrvalsdeildarinnar á heimavelli.

Svo fór að Carlton Cole bjargaði heimamönnum með síðbúnu marki. Mark Noble gaf stungusendingu á Ljungberg sem átti sendinguna fyrir mark Derby. Cole skoraði örugglega.

Blessunarlega fyrir heimamenn reyndist þetta lokamark leiksins.