Fabregas: Glórulaust að fara til City

Cesc Fabregas hjá Arsenal er einn þeirra leikmanna sem nefndir hafa verið til sögunar á meintum innkaupalista Manchester City í framtíðinni.

Spænski miðjumaðurinn tók ekki sérlega vel í hugmyndina um að fara til City í samtali við Daily Telegraph í dag.

"Það væri óðs manns æði fyrir mig að fara til City 21 árs gamall. Það væri glórulaust," sagði Fabregas.

Sagt er að City sé tilbúið að eyða hundruðum milljóna punda til leikmannakaupa á næstu misserum og er Fabregas aðeins einn af fjölmörgum stórstjörnum sem orðaðar hafa verið við félagið síðan moldríkir eigendur tóku yfir félagið á dögunum.