Poyet segist ekki á leið til Newcastle

Gus Poyet hefur verið einna helst orðaður við stjórastöðuna hjá Newcastle, og þá í sameiningu með Dennis Wise, en hann segist ánægður þar sem hann er.

Poyet er aðstoðarþjálfari Juande Ramos hjá Tottenham en hann vann áður með Wise bæði hjá Leeds og Swindon auk þess sem þeir léku saman hjá Chelsea.

„Það er alls ekkert í gangi," sagði Poyet í samtali við heimasíðu Tottenham. „Ég er mjög ánægður hér. Þetta eru einungis vangaveltur og auðvelt að slá þessu upp vegna sambands míns við Dennis Wise. Það þarf ekkert að hafa áhyggjur af þessu."

David Moyes, Didier Deschamps og Zico eru meðal þeirra sem hafa verið orðaðir við stjórastöðuna hjá Newcastle en Kevin Keegan sagði upp störfum fyrir skömmu.