Zola vill Steve Clarke með sér til West Ham

Ef Gianfranco Zola verður ráðinn knattspyrnustjóri West Ham vill hann fá Steve Clarke sér við hlið sem aðstoðarþjálfara. Þetta hefur Vísir eftir heimildum sínum.

Clarke hefur um árabil starfað hjá Chelsea og var þar þau sjö ár sem Zola lék með félaginu við góðan orðstír. Clarke lék alls 330 leiki imeð Chelsea á ellefu ára ferli, allt til ársins 1998.

Clark var gerður að aðstoðarþjálfara hjá Chelsea þegar Jose Mourinho tók við árið 2004. Hann starfaði einnig við hlið Avram Grant og er enn í dag starfandi hjá félaginu þó svo að Luiz Felipe Scolari hafi komið með heilt starfslið með sér.

Þessar sömu heimildir herma hins vegar að Clarke væri spenntur fyrir því að starfa við hlið Zola hjá West Ham. Hann þyrfti þó að fá sig lausan hjá Chelsea.