Framherji Hull úr leik í þrjá mánuði

Craig Fagan, framherji nýliða Hull í ensku úrvalsdeildinni, horfir fram á að missa úr næstu þrjá mánuði með liði sínu eftir að í ljós kom að hann er fótbrotinn.

Fagan varð fyrir hressilegri tæklingu frá Danny Guthrie í leik Newcastle og Hull um helgina og þurfti að fara af velli á hækjum. Nú er komið í ljós að hann er fótbrotinn og verður frá í á bilinu sex vikur til þrjá mánuði.

Guthrie fékk reisupassann fyrir tæklinguna og stjóri Hull, Phil Brown, vandaði honum ekki kveðjurnar í blaðaviðtali eftir leikinn.

"Svona er óþolandi og þessu verður að útrýma úr leiknum," sagði Brown.