Portúgalar nær öruggir 8-liða úrslit

Portúgalar eru komnir með annan fótinn í átta liða úrslitin á EM eftir 3-1 sigur á Tékkum í A-riðlinum í dag. Cristiano Ronaldo skoraði eitt mark og lagði annað upp fyrir portúgalska liðið.

Tékkarnir byrjuðu vel í leiknum en lentu undir eftir aðeins átta mínútur þegar Deco mokaði boltanum í netið í annari tilraun. Aðeins níu mínútum síðar náði Libor Sionko að skora með skalla eftir hornspynu og jafna fyrir Tékka.

Ronaldo kom Portúgal aftur yfir með þrumuskoti á 63. mínútu og lagði svo upp þriðja markið fyrir varamanninn Ricardo Quaresma undir lokin.

Portúgalar hafa nú hlotið 6 stig eftir tvo leiki, Tékkar hafa þrjú og Svisslendingar og Tyrkir, sem mætast síðar í kvöld, eru án stiga.