10 bestu refirnir í ensku úrvalsdeildinni

Breska blaðið Sun hefur tekið saman lista yfir 10 bestu "gömlu refina" sem spilað hafa í ensku úrvalsdeildinni í tilefni af því að hinn síungi Dean Windass tryggði Hull City sæti í úrvalsdeildinni síðasta vor.

Windass er 39 ára gamall og á góða möguleika á að komast inn á lista þessara öldnu höfðingja sem prýða lista Sun.

10. Lee Dixon

Þessi Arsenal-goðsögn lagði skóna á hilluna árið 2002 og var þá 38 ára gamall. Dixon spilaði stöðu hægri bakvarðar og var lykilmaður í ógnarsterkri vörn hins sigursæla liðs Arsenal á tíunda áratugnum. Hann var 14 ár hjá Arsenal og hætti á sama tíma og fyrirliðinn Tony Adams.

9. Gary Speed

Þessi síungi Walesverji ætti að vera fyrirmynd allra ungra knattspyrnumanna hvað það varðar að halda sér í góðu formi. Speed á að baki 20 ár í efstu deild og stuðningsmenn Bolton sáu mikið eftir honum á síðustu leiktíð þegar hann skipti yfir til Sheffield United.

8. Mark Hughes

Hughes er nú stjóri Manchester City, en leikmenn hans ættu að hlusta vel þegar hann talar - því Hughes hefur komið víða við á löngum og glæsilegum ferli. Hughes var enn að spila í úrvalsdeildinni þegar hann tók við landsliði Wales árið 1999. Hann lagði skóna á hilluna 38 ára gamall hjá Blackburn, en tók síðar við stjórastöðunni hjá félaginu.

7. Denis Irwin

Írski bakvörðurinn var einn stöðugasti leikmaður úrvalsdeildarinnar á 12 sigursælum árum með Manchester United. Hann hafði þó ekki spilað sinn síðasta leik á Old Trafford eftir að hann fór frá United, því hann sneri aftur þangað árið 2003 sem leikmaður Wolves eftir að hann hafði komið liðinu að komast upp í úrvalsdeildina. Hann var þá 38 ára gamall.

6. Stuart Pearce

Ferill Pearce var dramatískur í meira lagi og innihélt stóra sigra og mikil áföll (eins og misnotaðar vítaspyrnur). Lokaleikur Pearce í úrvalsdeildinni var með West Ham leiktíðina 2000-2001 þegar hann var 39 ára gamall, en "Psycho" spilaði reyndar tvö ár til viðbótar með Manchester City.

5. Nigel Winterburn

Winterburn spilaði á vinstri kantinum hjá Arsenal á móti Lee Dixon og þeir félagar urðu bara betri með aldrinum. Winterburn lék lengst af með Arsenal en lengdi feril sinn um þrjú ár með West Ham. Hann lagði skóna á hilluna 39 ára gamall.

4. Ray Wilkins

Wilkins lék á miðjunni með enska landsliðinu á sínum tíma, en spilaði reyndar síðasta leik sinn í úrvalsdeild með QPR árið 1994. Hann fór síðar frá félaginu en sneri fljótt aftur í nærri tvo ár - þá sem spilandi þjálfari. Hann var 39 ára gamall þegar hann hætti.

3. Bryan Robson

Kapteinninn lék sinn síðasta leik í úrvalsdeildinni sem spilandi þjálfari Middlesbrough og vantaði þá aðeins 10 daga í fertugsafmælið. Robson átti frábæran feril með Manchester United þar sem hann var fyrirliði liðsins.

2. Gordon Strachan

Þessi rauðhærði og snaggaralegi leikmaður varð fyrsti leikmaðurinn til að spila í úrvalsdeildinni fertugur að aldri. Hann var þá spilandi þjálfari Coventry, en gegndi engu að síður lykilhlutverki í liðinu. Fáir áttu von á að met hans yrði slegið í bráð, en annað kom á daginn.

1. Teddy Sheringham

Á toppnum situr maður sem virðist hafa ögrað tímanum. Hvort það er konan hans sem hefur haldið framherjanum svona ungum skal ósagt látið, en Sheringham spilaði sinn síðasta leik í úrvalsdeildinni fyrir West Ham þann 30. desember árið 2006. Hann vantaði þá aðeins 95 daga í 41. afmælisdag sinn og ljóst er að Dean Windass og aðrir aldnir kappar munu þurfa að hafa sig alla við til að slá met kappans.