Ný andlit á White Hart Lane á mánudag

Gera má ráð fyrir því að lið Tottenham mæti nokkuð breytt til leiks á mánudagskvöldið þegar liðið tekur á móti Aston Villa í ensku úrvalsdeildinni.

Þrír leikmenn sem liðið fékk í sínar raðir undir lok félagaskiptagluggans gætu þannig átt eftir að koma við sögu í leiknum á mánudaginn.

Framherjinn ungi Frazier Campbell kom til liðsins sem lánsmaður frá Manchester United í Berbatov-viðskiptunum, en óvíst er hvort hann muni koma við sögu á mánudag.

Tveir aðrir leikmenn eru þó nokkuð öruggir með að fá að reyna sig gegn Villa, en það eru króatíski landsliðsmaðurinn Vedran Corluka sem keyptur var á 8,5 milljónir frá Manchester City og rússneski framherjinn Roman Pavlyuchenko sem keyptur var fyrir 13,8 milljónir punda. Pavlyuchenko verður ætlað að fylla skarð Dimitar Berbatov í framlínu Tottenham.

Þá verður leikurinn á mánudaginn sérstakur fyrir miðvörðinn Ledley King, en hann mun þar spila sinn 200. leik fyrir félagið.