Scolari í vandræðum með að velja vín

Luiz Felipe Scolari, stjóri Chelsea, stendur frammi fyrir sannkölluðu lúxusvandamáli á sunnudaginn þegar hann mun halda í hefðina og fá sér vínglas með Sir Alex Ferguson eftir leik Chelsea og Manchester United.

Sú hefði er orðin rík á Englandi að stjórarnir setjist niður og sötri á víni eftir einvígi sín í knattspyrnuvellinum og Alex Ferguson er frægur fyrir vínmenningu sína.

Scolari er þó í nokkrum vandræðum með að velja vínið sem hann mun bjóða Skotanum að smakka á sunnudaginn.

"Við munum dreypa á víni eftir leikinn en ég veit að hann vill ekki portúgalskt vín - það sagði Jose Mourinho mér. Ég á ekkert brasilískt vín hérna á Englandi og því mun ég líklega bjóða honum upp á franskt eða suður-afrískt vín eftir leikinn. Hann á eftir að kunna að meta það," var haft eftir Scolari á vefsíðu Times.