Fékk ekki réttlláta málsmeðferð vegna aðkomu læknaráðs

Mannréttindadómstóll Evrópu úrskurðaði í dag að mál Söru Lindar Eggertsdóttur níu ára fjölfatlaðrar stúlku sem hlaut alvarlegar heilaskemmdir eftir fæðingu hefði ekki fengið réttláta málsmeðferð fyrir Hæstarétti Íslands, einkum vegna aðkomu læknaráðs. Faðir stúlkunnar segir niðurstöðuna áfellisdóm yfir íslensku réttarkerfi en það sé léttir að 9 ára baráttu sé lokið.

Mannréttindadómstóllinn dæmdi í dag íslenska ríkið til að greiða Söru Lind Eggertsdóttur 9 ára um sex og hálfa milljón króna í skaðabætur og eina og hálfa milljón í lögmannskostnað. Dómstóllinn komst að þeirri niðurstöðu að 6. grein Mannréttindasáttmála Evrópu hafði verið brotin og mál Söru Lindar ekki fengið réttláta málsmeðferð fyrir Hæstarétti einkum vegna aðkomu Læknaráðs sem var matsaðili í málinu. Heimir Örn Herbertsson lögmaður Söru Lindar og fjölskyldu hennar segir að í dóm Mannréttindadómstóls hafi ekki þótt æskilegt að Hæstiréttur styddist við álit læknaráðs þar sem læknar í ráðinu störfuðu á Landspítalanum. Hlutleysis væri ekki gætt með slíku fyrirkomulagi.

Sara Lind fæddist árið 1998 og var tekin með bráðakeisaraskurði. Hún veiktist alvarlega eftir fæðingu og var sett á sýklalyf. Æðarlegg var komið fyrir í Söru Lind sem var beygður og þar af leiðandi talinn hafa valdið því að blóðtappi myndaðist og súrefnisinntaka minnkað í kjölfarið. Talið er að Sara Lind hafi hlotið mikinn heilaskaða við þetta. Hún er í dag alvarlega fötluð í hjólastól og þarf aðstoð með allar daglegar athafnir. Foreldrar Söru Lindar höfðuðu mál gegn Landspítalanum árið 2001 og taldi Héraðsdómur Reykjavíkur að 100% örorku hennar mætti rekja til mistaka lækna við fæðingu og dæmdi henni 28 milljónir króna í skaðabætur. Hæstiréttur snéri dómnum við árið 2004 og sýknaði íslenska ríkið. Mannréttindadómstóllinn tók ekki afstöðu til hugsanlegra læknamistaka spítalans heldur einungis til málsmeðferðar.

Eggert Ísólfsson faðir Söru Lindar segir mikinn létti að 9 ára baráttu sé loksins lokið og hann sé sáttur við niðurstöðu Mannréttindadómstólsins. Hann segir dóminn vera áfellisdóm yfir íslensku réttarkerfi og áminningu fyrir Hæstarétt Íslands.