Kahn lætur ekki bugast

Þýski markvörðurinn Oliver Kahn ætlar ekki að láta neina strákpjakka slá sig út úr liði Bayern Munchen og segir ekki koma til greina að deila markvarðarstöðunni með hinum unga Michael Rensing. Kahn er 37 ára og er samningsbundinn Bayern út næstu leiktíð.

"Michael er augljóslega hæfileikaríkur markvörður og hans tími mun koma. Ég er hinsvegar með samning út 2008 og á meðan ég er að skila markvörslu yfir meðallagi er engin ástæða til að ræða markvarðarmáli hérna eitthvað frekar. Mér er alveg sama þó einhverjir ungir markverðir séu að standa sig vel og taka við keflinu hjá öðrum liðum," sagði Kahn og átti við unga menn á borð við Manuel Neuer hjá Schalke og Rene Adler hjá Leverkusen - en þeir hafa bolað sér reyndari markvörðum (Frank Rost og Hans-Jörg Butt) út úr byrjunarliðum.