Bangsakennarinn orðin tilefni milliríkjadeilu

Mál breska kennarans Gillian Gibbons og bangsans Múhameð er orðið að alvarlegri milliríkjadeilu Breta og Súdana. Gillian á yfir höfði sér ákæru fyrir að svívirða múslima en hún gaf sjö ára gömlum nemendum sínum leyfi til þess að nefna bangsann sinn Múhameð.

Utanríkisráðuneytið í Súdan reyndi í gær að gera lítið úr þessum deilum. Ali al-Sadeq talsmaður utanríkisráðuneytisins sagði að bresk stjórnvöld hefðu enga ástæðu til að óttast borgara sína sem staddir eru í Súdan. Hann lagði áherslu á að yfirmenn Gibbons hefðu beðið foreldra, nemendur og súdönsku þóðina afsökunar á misgjörðum hennar.

Gordon Brown, forsætisráðherra Breta, sagði í gær að hann vonaðist til þess að Gillian Gibbons yrði fljótlega sleppt úr gæsluvarðhaldi. Hann sagði að bresk stjórnvöld væru í sambandi við Súdani vegna þessa máls og gerðu það sem í þeirra valdi stæði til að tryggja öryggi Gibbons.

Almenningur í Bretlandi krefst þess að Gibbons verði leyst úr haldi. Múslimaráðið í Bretlandi hvetur súdönsk stjórnvöld til þess að beita sér í málinu. Muhammad Abdul Bari framkvæmdastjóri Múslimaráðsins segir mál Gibbons vera mjög leiðinlegt. Gibbons hafi augljóslega ekki ætlað sér að valda neinum skaða.