Leikmaður 7. umferðar: Emmanuel Adebayor

Emmanuel Adebayor stal senunni í ensku úrvalsdeildinni aðra helgina í röð þegar hann skoraði þrennu í 5-0 stórsigri Arsenal á Derby. Adebayor er því orðinn markahæstur í deildinni með sex mörk í aðeins fjórum leikjum.

Frammistaða Adebayor hefur vakið óskipta athygli í upphafi leiktíðar og hefur hann þegar skorað helming af þeim mörkum sem hann skoraði í öllum keppnum á síðustu leiktíð (12). Adebayor fór hamförum gegn Derby um helgina þar sem varnarmenn gestanna áttu engin svör við hraða hans, tækni og líkamlegum styrk. Hann varð jafnframt fyrsti leikmaðurinn til að skora þrennu á Emirates-vellinum.

"Mér varð hugsað til Thierry Henry í dag þegar Adebayor skoraði þriðja markið sitt - því það var dæmigert mark fyrir Henry. Adebayor er samt meira maður sem notar kraft sinn, styrk og hæfileika í loftinu til að skora mörk. Ég er ekki að segja að þeir séu líkir leikmenn, en þó eru atriði í leik þeirra sem eru mjög lík. Emmanuel spilaði mikið við hlið Henry þegar hann var hérna en mér finnst hann vera að ná vel saman við Van Persie," sagði Arsene Wenger um markaskorara sinn.

"Adebayor er klókur leikmaður. Hann fylgdist með öðrum leikmönnum í kring um sig og fékk góð ráð frá þeim. Henry kenndi honum mikið. Hann sagði honum að reyna að róa sig aðeins," sagði Wenger.

Adebayor var að vonum ánægður með þrennuna sína, þar sem hann sýndi m.a. gríðarlegan styrk sinn í loftinu og gott jafnvægi þar sem hann fékk langa sendingu, tók boltann á brjóstkassann, sneri og skaut.

"Það var frábært að skora fyrstu þrennuna á Emirates en ég er alltaf að horfa fram á veginn sem leikmaður. Við Robin vonumst til að þróa með okkur góða samvinnu í framlínunni en það sem mestu máli skiptir er að liðið sé að spila vel og vinna leiki. Það er frábær andi í liðinu og þetta er besta vikan mín síðan ég kom hingað," sagði Adebayor.

Billy Davies, stjóri Derby, gat lítið gert eftir 5-0 tap hans manna um helgina og talaði um fátt annað en það hvað leikmenn Arsenal væru góðir eftir leikinn. "Arsenal hefur innan sinna raða marga af bestu leikmönnum í heimi og ég held til að mynda að Adebayor hljóti að vera einn besti framherjinn í heiminum eins og hann er að spila í augnablikinu," sagði Davies eftir að Tógómaðurinn fór afar illa með varnarmann hans.

Nafn: Emmanuel Adebayor

Fæddur: Lomé á Tógó, 26. febrúar 1984

Félög: Metz, AS Monaco og Arsenal.

Númer: 25