McClaren: Nú er bara að taka Rússa

Steve McClaren, landsliðsþjálfari Englands, var í skýjunum eftir 3-0 sigurinn á Ísrael í gær. Hann vill að sínir menn endurtaki leikinn á miðvikudaginn þegar rússneska landsliðið mætir í heimsókn á Wembley.

„Áhorfendur voru svo sannarlega með okkur í þessu og við þurfum á þeim að halda á miðvikudaginn," sagði McClaren en Rússland vann Makedóníu 3-0 í gær og hefur stigi meira en enska liðið. England er í þriðja sætinu, þremur stigum á eftir toppliði Króatíu.

„Ég hefði verið ánægður með 1-0 sigur fyrirfram. Ég er sáttur við að vinna 3-0 en eftir á vildi ég sjá okkur skora fleiri mörk. En frammistaðan skiptir mestu máli. Mínir menn léku mjög vel í þessum leik."

Ákvörðun McClaren að tefla Emile Heskey, sóknarmanni Wigan, fram í byrjunarliðinu vakti mikla athygli. McClaren hrósaði Heskey eftir leikinn. „Hann gerði nákvæmlega það sem ég vonaðist til frá honum. Hann var erfiður viðureignar og vann vel fyrir liðið," sagði McClaren.