Scholes forðast sviðsljósið

Paul Scholes, miðjumaður Manchester United, hefur forðast sviðsljósið eins og heitan eldinn. Scholes veitir ekki sjónvarpsviðtöl og hefur oft sagt að hann vilji láta verkin tala á vellinum. Þetta hefur Sir Alex Ferguson nýtt sér til að keyra Scholes áfram.

„Scholes er frábær leikmaður og skemmtilegur persónuleiki. Hann hefur aldrei verið í sviðsljósinu því hann hefur aldrei viljað vera í því. Ef hann væri í sviðsljósinu þá væri hann ekki þessi leikmaður sem hann er í dag. Ég er klár á því," sagði Ferguson.

Hann segir ennfremur að hann hafi nýtt sér það að Scholes vill ekki veita sjónvarpsviðtöl. „Ég hef oft sagt við hann að ég muni skipa honum að fara í viðtal við sjónvarpið ef hann sé ekki að standa sig. Það er alltaf jafn fyndið að sjá svipinn á honum þá," sagði Ferguson.