Mourinho: Við megum ekki missa Lampard

Jose Mourinho hefur ítrekað fyrir foráðamönnum Chelsea hversu mikilvægt það er fyrir félagið að samningur miðjumannsins Frank Lampard verði endurnýjaður. Mourinho segir Lampard vera einstakan og lýsir afleiðingunum af hugsanlegri brottför hans frá félaginu sem hrikalegum.

"Ég hef sagt það áður og segi það einu sinni enn; Lampard er einstakur. Hann er góður í vörn, góður í sókn, skorar mikið af mörkum og leggur ótrúlega mikið á sig. Við getum ekki misst hann," sagði Mourinho, en vitað er að Barcelona hefur mikinn áhuga á að fá Lampard í sitt lið. Lampard er sagður vilja fá umtalsverða launahækkun eigi hann að skrifa undir nýjan samning við Chelsea og segir Mourinho að félagið eigi að verða við kröfum hans.

"Samningamál eru í höndum stjórnarinnar og ég skipti mér ekkert af þeim. Það eina sem ég get gert er að segja þeim hversu mikilvægur hann er okkar liði. Félagið ætti að gera allt sem það getur til að halda í svona mikilvægan leikmann," sagði Mourinho jafnframt.