Samstaða um að bregðast við ólöglegum netfjárhættuspilum

Samstaða var um það á Alþingi í dag að bregðast þyrfti við auglýsingum um fjárhættuspil sem birst hefðu í fjölmiðlum á undanförnum vikum og fjárhættuspilum á Netinu en jafnframt að málið væri snúið og því ekki auðvelt að koma böndum á slíka starfsemi.

Það var Ögmundur Jónasson, þingmaður Vinstri - grænna, sem tók málið upp í utandagskrárumræðu og benti á að fyrirtæki betsson.com hefði í nokkurn tíma auglýst í íslenskum fjölmiðlum. Fyrirtækið væri rekið í útlöndum en samkvæmt íslenskum lögum væri starfsemi sem þessi ekki leyfileg. Fréttir hefðu borist af spilafíklum hér á landi sem farið hefðu illa út úr spili á Netinu og við því yrði að bregðast.

Spurði hann Björn Bjarnason dómsmálaráðherra hvað hann ætlaði að gera til að stemma stigu við hinu ólöglega fjárhættuspili Betsson og hvort hann hygðist koma á fót nefnd til þess að stemma stigu við spilastarfsemi en slíkt væri tæknilega hægt.

Björn Bjarnason dómsmálaráðherra tók undir áhyggjur Ögmundar og vísaði til þess að ráðuneytið hefði farið fram á það við lögreglu í mars í fyrra að háttsemi Betsson yrði stöðvuð. Enn væri ekki komin niðurstaða í málið.

Benti hann á að fyrirtækið starfaði á Möltu sem væri annað tveggja Evrópuríkja sem leyfðu spilamennsku á Netinu. Til þess að skapa öryggi í þessu máli þyrfti alþjóðlegar reglur. Málið hefði verið rætt á vettvangi OECD, Evrópusambandsins og Alþjóðaviðskiptastofnunarinnar. Náið yrði fylgst með framvindu mála þar.

Fjölmargir þingmenn tóku til máls og lýstu áhyggjum sínum af spílafíkn í landinu og mikilvægi þess að bregðast við sem fyrst. Þá þyrfti að rannsaka umfang spilafíknar hér á landi. Þá lýstu sumir þingmenn efasemdum um að stofnanir eins og Háskóli Íslands ættu að standa í fjárhættuspilum.