Sömdu um gagnkvæma aðstoð í bráðatilvikum

Slökkvilið höfuðborgarsvæðisins, Brunavarnir Árnessýslu, Slökkvilið Hveragerðis og Heilbrigðisstofnun Suðurlands sömdu í dag um gagnkvæma aðstoð og sameiginleg viðbrögð við slysum, eldsvoðum og öðrum bráðatilvikum þar sem þjónustusvæði þeirra liggja saman.

Eftir því sem segir í tilkynningu nær samkomulagið meðal annars til virkjana Orkuveitu Reykjavíkur á Nesjavöllum og Hellisheiði, Þingvalla, Hellisheiðar og Þrengslavegar. Með samkomulaginu á að tryggja sem skjótust, öruggust og öflugust viðbrögð við slysum og öðrum atburðum þar sem þörf er á sjúkraflutningum og/eða slökkviliði.

Bent er á að þar sem svæði viðbragðsaðilanna liggja saman séu líkur á að annar en viðkomandi þjónustuaðili geti brugðist fyrr við. Þannig sé til dæmis styttra til Þingvalla frá stöð Slökkviliðs höfuðborgarsvæðisins á Tunguhálsi en frá Selfossi og Hveragerði.