Lukkan á bandi Real Madrid

Real Madrid var fjarri sínu besta í spænska boltanum í kvöld þegar liðið vann 2-1 sigur á botnliði Celta Vigo á útivelli og náði þriðja sæti deildarinnar. Sevilla gerði aðeins markalaust jafntefli við Osasuna og því hefur Barcelona nú tveggja stiga forystu á toppnum.

Slysalegt skallamark Robinho tryggði Real Madrid sigur í lokin en áður hafði Ruud Van Nistelrooy komið Real yfir með marki úr vítaspyrnu. Angel jafnaði leikinn fyrir Celta, en mistök markvarðar liðsins og heppni Brasilíumannsins tryggðu sigur Real sem var síst betri aðilinn á löngum köflum.