Munu ekki geta glatt sjómenn

Fiskifræðingar segja ekki koma á óvart að mikið sé af vænum þorski á miðunum úti af Grindavík. Þeir geta þó ekki glatt sjómenn með því að von sé á tillögum um auknar veiðiheimildir.

Skipstjórar sem Stöð tvö ræddi við í Grindavík í gær segjast aldrei hafa lent í öðru eins fiskiríu og að undanförnu og þorskurinn væri vænni en sést hefði í manna minnum. Axel Jónsson skipstjóri á Kristínu segir sjóinn fullan af þorski og það sé erfitt að komast hjá því að veiða hann þegar reynt sé að veiða aðrar tegundir. Sigurður Garðar Steinþórsson skipstjóri á Skátanum, spyr hvort sjómenn séu ekki að finna 800 þúsund tonn af þorski sem fiskifræðingar hafi týnt fyrir nokkrum árum.

Hjá Hafrannsóknarstofnun segja sérfræðingar að ekki þurfi að koma á óvart að sjórinn sé fullur af feitum og pattaralegum þorski. Björn Ævarr Steinarsson forstöðumaður veiðiráðgjafarsviðs stofnunarinnar, segir þetta algerlega í samræmi við ástandsskýrslur Hafró. Nú séu sterkir árgangar frá 1998 - 2002 á ferðinni.

Björn Ævarr segir Hafrannsóknarstofnun fylgjast mjög vel með ástandi sjávar. Togararalli sé ný lokið og í byrjun næsta mánaðar verði farið í netarall og eftir það taki stofnsmatsvinna við.

Hafrannsóknarstofnun fær einnig afladagbækur skipa til að vinna úr og því sé varla hægt að hafa nýrri upplýsingar en stofnunin hefur. Björn Ævarr á ekki von á því að Hafró geti fært sjómönnum betri fréttir næsta haust með tillögum um auknar heimildir í þorskveiðum. Stofnunin hafi þvert á móti lagt til aflasamdrátt, enda séu mjög lélegir árgangar að koma inn í veiðistofnunn á næstu árum.