Justin og Cameron ennþá ástfangin?

Justin Timberlake og Cameron Diaz slitu sambandi sínu til fjögurra ára nú í janúar. Hefur Justin þótt iðinn við kolann eftir sambandsslitin en hann hefur verið orðaður við leikkonurnar Scarlett Johansson og Jessicu Biel. Lítið hefur þó spurst af karlamálum Cameronar.

Nú ber svo við að fjölmiðlar eru farnir að velta því fyrir sér hvort þau Justin og Cameron séu aftur að leiða saman hesta sína en til þeirra sást á hótelbar í Hollywood á föstudagskvöld.

Justin hafði komið á barinn fyrr um kvöldið og var meðal annars með leikstjóranum Martin Scorsese. Kom Cameron á barinn um klukkan eitt eftir miðnætti en þá stóð Justin upp og fór til hennar. Töluðu þau saman í lágum hljóðum en ekki sást þó til þeirra kyssast eða halda í hendur hvors annars samkvæmt heimildum People.

Það verður því fróðlegt að sjá hvort ástin hafi ekki kulnað og ennþá sé hiti þeirra á milli, eða hvort þetta sé allt misskilningur.