Lífið

Fálkaorður fyrir fúlgur fjár

Örnólfur Thorsson forsetaritari segir skýrar reglur gilda um fálkaorðuna, og hana megi ekki selja.
Örnólfur Thorsson forsetaritari segir skýrar reglur gilda um fálkaorðuna, og hana megi ekki selja. MYND/GVA

Íslensk fálkaorða er á meðal muna sem orðu- og myntsalinn Najafgholi Chalabiani býður upp á eBay þessa dagana. Á heimasíðu fyrirtækisins Najaf Coins and Collectibles, sem Chalabiani rekur í Vancouver í Kanada, má finna ellefu íslenskar fálkaorður til viðbótar.

„Það er ljóst mál að það má ekki selja fálkaorður," sagði Örnólfur Thorsson forsetaritari um málið. „Það eru ákveðnar reglur um fálkaorðuna, og þær fela í sér að eftir að sá sem ber fálkaorðu er fallinn frá ber erfingjum að skila henni til embættissins. Hún á sem sagt ekki að fara úr höndum þess sem hana hlýtur nema til að koma til baka, það eru skýrar reglur," sagði Örnólfur.

Hann segist áður hafa orðið var við að fálkaorður séu boðnar upp á eBay eða svipuðum netsíðum, en veit ekki til þess að það hafi verið gert í slíku magni. „En ég bendi á það að það er ekki fullvíst að um þarna sé um raunverulegar fálkaorður að ræða, þarna gætu verið eftirlíkingar á ferð," sagði Örnólfur.

Ekki er hægt að skera úr um hvort fálkaorðurnar á heimasíðu Chalabiani séu raunverulegar, en í orðsendingu frá Najaf Coins and Collectibles segist hann ábyrgast að allir munir séu ósviknir. Í samtali við Fréttablaðið sagðist Chalabiani kaupa orður um heim allan, annað hvort í verslunum eða á uppboðum, en gaf ekki upp hvaðan þær íslensku væru fengnar.



Najafgholi Chalabiani selur tólf íslenskar fálkaorður á eBay og heimasíðu sinni.

Hann sagðist þó finna fyrir nokkurri eftirspurn eftir íslenskum orðum. „Það eru ekki til það margar íslenskar orður, þetta er lítið land. En heimurinn er stór og það er alltaf hægt að finna einhvern áhugasaman," sagði Chalabiani, sem kvaðst ekki hafa selt margar íslenskar orður í gegnum tíðina. Sem upphafsboð á eBay setti Chalabiani tæplega 7500 bandaríkjadali, eða um 490.000 íslenskar krónur. Sú dýrasta á heimasíðu hans kostar ríflega 700.000 íslenskar krónur. „En við vitum ekki hvort þær fara fyrir þetta verð," sagði Chalabiani.

 

upprunaskjal? Fálkaorðunni á eBay, þar sem lágmarks boð er 7.500 dalir, fylgir þetta skjal, sem virðist undirritað af frú Vigdísi Finnbogadóttur.

Orðunni á uppboðssíðunni eBay fylgir skjal sem virðist vera undirritað af Vigdísi Finnbogadóttur, þó að erfiðara sé að átta sig á á hvern skjalið er stílað og hvenær það var afhent. Ekki er heldur hægt að skera úr um hvaðan orðan er komin. „Fálkaorður er ekki númeraðar og því er ógerningur að rekja þær," sagði Örnólfur. Fjöldi þeirra sem þegið hafa fálkaorðu á lýðveldistíma liggur ekki fyrir, en unnið er að lokafrágangi heildarskrár yfir þá. Verður skráin aðgengileg innnan skamms á heimasíðu embættisins. Í dag veitir Forseti Íslands um tíu til fjórtán orður tvisvar sinnum á ári.






Fleiri fréttir

Sjá meira


×