Simmi & Jói sameinaðir á ný

„Já, við hljótum að vera alveg sjálfkjörnir vinnustaðagrínarar. Atvinnumenn í faginu. Það hlýtur að vera," segir Jóhannes Ásbjörnsson, betur þekktur sem Jói í dúettinum Simmi og Jói. Þekktastir eru þeir fyrir að kynna hið íslenska Idol auk þess að hafa verið saman með sjónvarps- og útvarpsþætti.

Sigmar Vilhjálmsson hefur nú söðlað um. Hann hefur sagt upp störfum hjá 365 en þar hefur hann sinnt ýmsum störfum, síðast var hann sölustjóri áskriftardeildar. Landsbankinn bauð í Simma sem mun taka við stjórn nýrrar deildar sem sér um vildarkerfi nýrrar kortadeildar. Og hver situr ekki á fleti fyrir í Landsbankanum annar en Jói sem starfar á markaðssviði bankans.

„Þetta er magnað og leggst rosalega vel í mig. Heldur betur," segir Jói og harðneitar því að einhver samkeppni muni ríkja þeirra á milli innan bankans, hvorki faglega og né sem helsti djókarinn innan bankans.

„Við erum að vinna að ólíkum hlutum innan bankans," segir Jói sem nú liggur fárveikur í flensu heima hjá sér. Og verður því ekki til að taka á móti vini sínum þá er hann kemur til starfa.

Af er sem áður var. Í samtali við Fréttablaðið er Simmi allt í einu orðinn mjög gætinn hvaða orð hann velur í samtali við blaðamann. „Sem bankamaður neita ég að svara meiru nema í návist lögfræðings," segir hann eftir að hafa útskýrt hvaða hlutverki hann mun gegna innan bankans.

Tiltölulega stuttur aðdragandi er að þessum umskiptum, var ákveðið á föstudaginn og aðspurður harðneitar Simmi að tjá sig um hvort bankinn borgi ekki miklu betur en fjölmiðlafyrirtækið. En samkvæmt heimildum blaðsins var það Landsbankinn sem bauð Simma starfið þannig að gera má ráð fyrir því að hann þiggi betri laun innan bankakerfisins en í auglýsingabauki fyrir sjónvarp - þó enginn svelti þar.

„Já, þetta er húmorískt," segir Simmi en þeir Jói hafa starfað saman með hléum nú hátt í tíu ár. „Hann var einmitt að segja við mig starfsmannastjórinn að það yrði líklega skrifað meira um þetta en þegar Fréttablaðið greindi frá því að konur okkar væru nú báðar flugfreyjur."

Og það er laukrétt hjá Simma og starfsmannastjóranum.