Rússar og Íranar ræða kjarnorkumál

Samningaviðræður Rússa og Írana um samvinnu vegna kjarnorkuáætlunar Írana hófust í Moskvu í morgun. Þetta er haft eftir talsmanni öryggisráðs rússneska þingsins. Rússar hafa boðist til þess að auðga úran fyrir Írana og þar með draga úr þeirri alþjóðadeilu sem er uppi vegna kjarnorkuáætlunar stjórnvalda í Teheran. Íranar segjast vilja nota kjarnorku til orkuframleiðslu en vesturveldin telja víst að þeir ætli að framleiða kjarnorkuvopn. Búist er við að viðræðurnar standi fram eftir degi en þær fara fram bak við luktar dyr.