Vissi að Katrín kynni að brjóta niður flóðvarnir

George Bush Bandaríkjaforseti vissi að fellibylurinn Katrín kynni að brjóta niður flóðvarnir New Orleans degi áður en fellibylurinn skall á borginni.

Þetta kemur fram í myndbandsupptöku sem AP fréttastofan hefur komist yfir og gengur þvert gegn því sem Bush hefur haldið fram hingað til, að enginn hafi getað séð fyrir hve mikil áhrif fellibylsins yrðu. Embættismenn vöruðu forsetann við að áhrif fellibylsins yrðu líklega slík að björgunarsveitir á svæðinu myndu ekki ráða neitt við neitt. Forsetinn sagði stjórnvöld hins vegar vel undirbúin og að næg aðstoð myndi berast í tæka tíð.