Aston Villa vill fá Defoe

Samkvæmt fregnum frá Englandi í morgun er Aston Villa að undirbúa 12 milljón punda tilboð í Jermain Defoe, framherja Tottenham, um leið og leikmannaglugginn opnar í byrjun janúar.

Randy Lerner, nýr eigandi Aston Villa, hefur lofað knattpspyrnustjóranum Martin O´Neill pening til leikmannakaupa og er búist við því að hann fái til liðsins framherja í háum gæðaflokki. Defoe hefur ekki átt fast sæti í liði Tottenham, þar sem hann berst við Dimitar Berbatov, Mido og Robbie Keane um tvö sæti, en hjá Aston Villa yrði hann nær örugglega fyrsti sóknarmaður.

Talið er að Martin Jol, stjóri Tottenham, muni beina spjótum sínum að norska vinstri fótar vængmanninum Morten Gamst Pedersen hjá Blackburn, fari svo að hann fái umtalsverðan pening fyrir Defoe.