Tæpur þriðjungur á heimsvísu hlynntur pyntingum

Í könnun sem BBC lét gera í 25 löndum kemur fram að á heimsvísu er tæpur þriðjungur, eða 29% hlynntur pyntingum. Mestur stuðningur við pyntingar er í Ísrael, þar sem 43% telja pyntingar réttlætanlegar í vissum tilvikum. Rúmur þriðjungur Bandaríkjamanna er hlynntur pyntingum að einhverju marki ef með því má bjarga mannslífum.

Í frétt BBC kemur fram að meirihluti þeirra sem spurðir voru í sérhluta könnunarinnar í 19 af löndunum 25 telja að áfram eigi að gilda strangar reglur sem banna pyntingar í fangelsum á þeim forsendum að þær gangi gegn góðu siðgæði og mannréttindum.