Hvalur 9 siglir inn Hvalfjörð til að undirbúa fyrstu veiðiferðina

Íslensk stjórnvöld tilkynntu í dag að hvalveiðar í atvinnuskyni og veiðar á stórhvölum væru hafnar á ný. Sjávarútvegsráðherra skýrði Alþingi frá því að hann hefði heimilað veiðar á 9 langreyðum og 30 hrefnum, til viðbótar þeim 39 hrefnum sem áður var ákveðið að yrðu veiddar í vísindaskyni.

Hvalur níundi, flaggskip hvalveiðiflotans, sigldi nú síðdegis inn Hvalfjörð, áleiðis að hvalstöðinni, sem hefur verið verkefnalaus frá árinu 1989. Þar voru menn í dag á fullu að undirbúa hvalveiðivertíð. Þetta skip fær nú leyfi til að skjóta stórhveli á ný, eftir 17 ára hlé, en heimilað verður að veiða níu langreyðar á fiskveiðiárinu, sem hófst 1. september. Yfirlýsing ráðherra kom þegar hann svaraði fyrirspurn frá Magnúsi Þór Hafsteinssyni, þingmanni Frjálslyndra, en áður hafði ráðherrann gert utanríkis og sjávarútvegsnefndum þingsins, sem og forystumönnum stjórnarandstöðunnar, frá ákvörðun sinni, sem tekin var í samráði við ríkisstjórn.

Einar K. Guðfinnsson sjávarútvegsráðherra sagði ákvörðunina byggða á stefnumörkun Alþingis frá árinu 1999 þar sem ályktað var að hvalveiðar skyldu hafnar í atvinnuskyni. Hann sagði þjóðréttarlegar heimildir Íslendinga til staðar og reynt hefði verið að stíga hvert skref varlega, veiðarnar væru sjálfbærar en menn yrðu þó að vera viðbúnir miklum mótmælum. Pólitísk viðbrögð á Alþingi voru misjöfn, þingmenn Samfylkingarinnar lýstu efasemdum en þingmenn Vinstri grænna lýstu andstöðu. Kristinn H. Gunnarsson, Framsóknarflokki, sagði ráðherra hafa skýrt pólitískt umboð Alþingis, og hér væru tímamót á ferðinni. Guðjón Hjörleifsson, Sjálfstæðisflokki, óskaði Íslendingum til hamingju með daginn, og kvaðst gera ráð fyrir að víða væri flaggað í dag. Magnús Þór Hafsteinsson lýsti eindregnum stuðningi Frjálslyndra og sagði hér stórmál á ferðinni sem snerist um sjálfsákvörðunarrétt þjóðarinnar.