6 tonna steypuplata féll á starfsmann Ístaks

Það má með sanni segja að starfsmaður Ístaks á Keflavíkurflugvelli hafi ekki verið feigur þegar að sex tonna steypuplata féll á hann um klukkan fjögur í dag. Verið var að setja gólf í eitt flugskýlið þegar að steypuplatan hrundi ofan á manninn og brotnaði og var í fyrstu talið að um mjög alvarlegt vinnuslys væri að ræða og var maðurinn fluttur í skyndi til Reykjavíkur. Að sögn vakthafandi læknis á slysadeild er hreint með ólíkindum hve vel maðurinn slapp en hann hefur verið sendur heim með smá mar og skrámur. Telur læknirinn að þarna hafi verið á ferðinni hreint og klárt kraftaverk því röð sérkennilegra atburða hafi orðið til þess að manninn sakaði lítið sem ekkert.