H5N1 í innlendum alifuglum í Frakklandi

Chirac Frakklandsforseti hvetur landa sína til að sýna stillingu þó hið hættulega H5N1 afbrigði fuglaflensu hafi greinst í kalkúnum á alifuglabúi í austurhluta landsins. Greiningin fékkst staðfest síðastliðna nótt. Þetta er í fyrsta sinn sem þetta afbrigði veirunnar greinist í innlendum alifuglum í Evrópusambandsríki.

Ellefu þúsund alifuglar voru á búinu og drápust 80% þeirra í vikunni. Búið er að farga hinum. Sala á alifuglakjöti hefur minnkað um 30% í Frakklandi síðan ljóst varð að flensan hefði greinst í villtum fuglum þar og það þrátt fyrir að yfirvöld fullvissi íbúa um að óhætt sé að neyta alifuglakjöts sé það fulleldað.

Nú óttast hagsmunaaðilar að salan minnki enn eftir þessar nýjustu fréttir. Japanar hafa, fyrstir þjóða, sett innflutningsbann á alifuglakjöt frá Frakklandi en Frakkar eru helstu útflyjendur alifuglakjöts allra Evrópusambandsríkjanna. Sala á fuglakjöti hefur einnig hrunið á Ítalíu og í Grikklandi þar sem flensan hefur einnig greinst.

Í morgun tilkynnt Japanar að þeir ætla að banna innflutning á hollenskum alífuglum þar sem Hollendingar ætla að byrja á bólusetja einhvern hluta þeirra fyrir flensunni innan tíu dag. Evrópusambandið gaf leyfi fyrir því fyrir helgi.