Engin fuglaflensa enn fundin í Danmörku

Engin fuglaflensa hefur verið greind í dauðum fuglum sem fundist hafa í Danmörku síðustu daga. Frá þessu greindu yfirvöld í dag. Búið er að rannsaka 30 svani ásamt mávi og önd sem fundust á Sjálandi, Lálandi og Falstri og engin flensa fannst í fuglunum.

Neytendaráðherra Danmerkur varar þó við því að slakað verði á vörnum því flensan hafi þegar greinst í Norður-Þýskalandi og því sé hún mjög nærri landinu. Frekari rannsóknir eru fyrirhugaðar í Danmörku á næstunni enda hafa um 200 dauðir fuglar verið fluttir til rannsóknarstofu í Árósum. Við þetta má bæta að rannsóknir á tíu dauðum fuglum í Sviss hafa leitt í ljós að þeir drápust ekki úr fuglaflensu.