Verður samið um þinglok í dag?

Það ræðst á næstu klukkustundum hvort samið verði um að ljúka sumarþingi, jafnvel á morgun. Þreifingar eiga sér nú stað milli stjórnar og stjórnaranstöðu um þau mál sem harðast er deilt um og hvort fresta eigi þeim til næsta hausts.

Þing kom saman á þriðjudag eftir nokkurra vikna frí vegna sveitarstjórnarkosninga og ljóst var að á annað hundrað mál lágu fyrir óafgreidd. Síðustu tvo daga hafa afköstin hins vegar verið mikil á þingi því í gær voru 50 mál rædd eða afgreidd og 73 mál, sem eru á dagskrá í dag, eru langt komin.

Um flest málanna er samkomulag milli stjórnar og stjórnarandstöðu en um önnur er deilt hatrammlega, til að mynda frumvarp um hlutafélagavæðingur Ríkisútvarpsins og frumvarp um Nýsköpunarmiðstöð Íslands. Um þau snúast einmitt þreifingar stjórnar og stjórnarandstöðu, það er hvort fresta eigi umdeildum málum til hausts eða ekki.

Arnbjörg Sveinsdóttir, þingflokksformaður Sjálfstæðisflokksins, segir stjórnarliða áfram leggja áherslu á RÚV-frumvarpið og frumvarp um Nýsköpunarmiðstöð. Þetta séu mál sem séu langt komin, sérstaklega RÚV-frumvarpið þar sem þriðja umræða sé hafin. Það sé því engin efnisleg ástæða til að hætta við málið núna.

Aðspurð segist Arnbjörg hæfilega bjartsýn á sættir um þinglok í dag. við þessar aðstæður á þingi breytist allt mjög hratt og hún slái engu föstu fyrr en niðurstaða sé komin í málinu.

Kristján L. Möller, varaþingflokksformaður Samfylkingarinnar, segir ljóst af hálfu stjórnarandstöðunnar að hægt sé að semja um þinglok ef ákveðin mál, eins og RÚV-málið, detti út og verði tekin upp í haust. Þá losni um og þá sé kannski hægt að klára á morgun.

Fundur hófst nú klukkan fimm hjá forseta Alþingis og þingflokksformönnum flokkanna þar sem ræða átti þinglok. Ekki er ljóst hvenær honum lýkur.